Astures

D'Iventia

Los Astures (o ástures) fueron un pueblu asitiáu nel noroeste de la Peninsula Ibérica, el sou orixen nun ta nidiu y hai dos posturas principales. Una qu'indica la posibilidá que l.legaran dende'l ríu Ister (nome en griegu del Danubiu) y la zona d' Estiria (Austria), pola coincidencia de los nomes y la esplicación del nome d'esti pueblu como raigañu celta o indoeuropéu. Y otra siñala que las poblaciones astures son la evolución de los habitantes asitiaos na zona dende'l Mesolíticu o escomienzos del Neolíticu y son la evolución cultural de las poblaciones que fixeron pinturas como Tito Bustillo, o nel casu de los cántabros, Altamira; básase nas rellaciones culturales ente tolos pueblos de la Península Ibérica y Aquitania.

Tabla de conteníos

El nome

Paez sere qu'esti nome dieron-ylu los romanos nel sou contautu, el nome provenía de la denominación del ríu Esla na llingua indíxena y el so significáu puede esplayase pol vascu antigu como agua ente piedras. Esta teoría ye la más aceutada polos hestoriadores, llingüistas y arqueólogos si bien esisten otras que lu espliquen pol raigañu celta -str que significa tamién ríu.

En cuanto a que Astura seya l'Esla, el Seya o cualquier otru ríu, esplícase en favore del primeiru pol tamañu, ye dicire, cuando los romanos contautan colos astures fácenlo pela Meseta y pel ríu más grande de la rexón, que ye l'Esla. Si bien, tamién hai razones pa decantase pol Seya, la mayoría d'estudios consideran que ye'l ríu llionés del que deriva la designación romana pa esti pueblu.

Anguaño nas Ciencias Hestóricas empléganse dos nomes; ástures pa referise a las poblaciones prerrománicas del conventu d'Asturica Augusta -actual Astorga-, y astures pa las poblaciones que caltenían la cultura, llingua y relixón nas dóminas hestóricas y altomedievales de los reinos Astur y de Llión.

Tribus y clanes

• Trasmontanas

Los Pésicos: Argamonicos.

Los Llugones: Ablaidacos, Abilicoros, Agubrigenses, Arganticaenos, Argantorios, Arronidaecos, Cabranginos, Cadabrigenses, Coliacinos, Cilúrnigos, Vincianos, Viromenigos y Oilaridos.

Los Penios: Caelionicaecos y Quetianos.

Los Cabarcos: Berisonis.

•Cismontanas o Augustanas

-Los Gigurros:

-Los Zoeles: Desoncos, Tridiavos, Visaligos, Cabruagenos.

-Los Orniacos: Avolgigos.

-Los Saelenos:

-Los Superatios: Blanobriensos, Bolgenses, Louguios.

-Los Tiburos:

-Los Bedunienses:

-Los Lancienses:

-Los Brigaecinos:

-Los Amacos: Saldanicos.

-Los Lóugei:

-Los Iburros:


Afiliación

L'afiliación d'estas poblaciones ye percomplicada d'entamar, dao las pocas fontes y l'ausencia de lliteratura. Sí conocemos, que yeran matriarcales o que taban nel procesu del pasu d'esti al patriarcáu, cosa que los alluenxaría de los celtas y poblaciones indoeuropeas. Muncha de la toponímia esplícase por el vascu antigu pero tamién pol celta ou el lusitanu. Tamién paez que taban en contautu con poblaciones celtas o averás a esta cultura, si qu'asina nun se puede afirmar que fueran celtas, munchas de las concomitancias ente dambas culturas débense a procesos de resolución cultural común ente los pueblos del mundiu. Poro, davezo inclúyense nun grupu nomáu Pueblos del Noroeste formáu por galáicos, cántabros, vascones, autrigones, várdulos y carístios.

Xeografía

Los Astures ocupaban el norte de Zamora, casi que tola provincia de Llión, sacante la zona oriental, y casi toa Asturias(dende'l riu seya nel Esti per onde llindan colos pueblos cantabros, fasta la sierra el Ranadoiru pel Oeste onde llindan colos Albiones). Según Plinio la población Astur sedría d'unos 240.000 hab.

Las principales ciudaes o asentamientos de los que se tienen constancia son por referencias de los autores grecollatinos o pola arqueoloxía. Considérase que'l principal asentamientu de los astures yera Lancia, nel oteru de Lance, en Sollanciu (Villasabariegu, Llión), que foi una mena de Numancia astur. Pero tamién esisten referencias y restos d'asentamientos grandes en:

Amás de multitú de castros de los que quedan restos en Xixón, La Cabreira, La Valduerna, la Valdería, el Bierzu, los restos funerarios de los Valles de Benavente.

Forma de Vida

Basaban la súa vida na recoyida de frutos y la cacia. Demientres gran parte el añu usaban la Llande como el sou alimentu fundamental, secandolu, mayandolu y dempués cola súa fariña facían un pan que se-ys conservaba durante llargu tiempu. Contaban tamién cola agricultura enque yera escasa, na que ver cola de pueblos mas sureños.

Las tierras semás na dómina prerromana yeran escasas, d'estos semaos sacaban cebada cola que facían cerveza, asina como especies primitivas d'escanda y cerru. Debíu a esta entreseca y al sou cermuñu calter guereru facían incursiones frecuentes na tierra los Vaceos,los cuales sí tenian perdesarrollada l'agricultura.

Según autores clásicos la súa estructura familiar yera matriarcal:la muyer yera propietaria y heredaba.

Los Astures poblaban en castros, ubicaos en llugares estratexicos y amurallaos, onde las cabanhas yeran circulares na actual Asturias y en dóminas inhóspitas de Llión, y retangulares en dóminas más l.lanas.

Vistían con sayos apretaos, siendo un vezu xeneral en tolas tribus cantábricas. Las muyeres decorábanlos con materias vexetales de gran collor. Los homes llevaban melenas que ceñían con cintas nel combate. EL calzáu sedría asemeyau a las actuales abarcas.

Tenían un gran conocimientu del mediu natural, usando plantas medicinales. A los enfermos sacábanlos a los cruces de los caminos por si dalgún viandante conociese la cura a dicha enfermedá.

L'armamentu principal ente los Astures yera'l dardu; usaban escudos tantu pequeños comu grandes pero toos ellos en forma circular, el puñal y la espada curtia d'antenas tamién yeran utilizaos, la falcata utilizada posiblemente debío a influencias d'otros pueblos peninsulares, tamién las hachas de doble filu, las fondas y las lanzas yeran armas usás per estas tribus. Enfrentaronse a Roma prauticando guerra de guerrillas, executando emboscás y maniobrando en terrenos pindios onde lluchaban a caballu. Fueron famosos los sos caballos y la so caballeria. En tando dominaos por Roma, alistabanse comu temibles mercenarios, na muria d'Adriano construyida por Roma pa protexer las súas dóminas d'invasiones de los Pictos. Tiense constanza de dos alas de caballeria astur que llucharon comu mercenarios.

Usaban barcas de cueru cosías, onde namai la quilla yera de madera, barcos asemeyaos a los usaos por Lusitanos y Saxones.

Hai que destacar que yeran perbonos orfebres como se puede ver nel Ayalgu d'Arrabalde o na Diadema de Moñes, lu que se xunía al sou trabayu como mineros como queda amosáu nas minas de La Cabreria (las Medulillas, Benuza) y del Bierzu, (las Médulas).

Relixosidá

Al igual qu'outras culturas posiblemente preindoeuropeas, los ástures, tenían como dioses proteutores a las fuercias de la Natura. Gracias a las referencias d'Estrabón sabemos qu'adoraban a la Lluna como a una diosa básica de lo espiritual y de la fertilidá, lu qu'afirma que yeren matriarcales ou en procesu de patriarcalización.

Conócense dellas divinidaes pola toponimia y pola documentación romana y medieval que llegó ta nós. Dalgunas de las divinidaes que se saben yeran adorás por esti pueblu son:

  • Belenos, identificáu polos hestoriadores de l'Antigüedá con Apolo. Rellacionáu con él pue tar el topónimo de San Xuan de Beleño (Ponga).
  • Cándamu: dios de la Vexetación y las Fontes, del que toma'l nome un conceyu asturianu. Entá esiste nel conceyu de Llión, nel parque natural de la Candamia una copia de la fonte dexada a Iove Candamus -Júpiter Cándamu- polos romanos en siñal de sincretismu.
  • Lug: paez que ta rellacionáu colas poblaciones aceltizás del centru y oucidente d'Asturias, tóponimos como'l de Llugones -averáu a Uviéu- muesan la esistencia d'esti proteutor.
  • Taranis, deidá que los hestoriadores de l'antigüedá identificaron con Ares. Probablemente tengan rellación con él topónimos como Taranes (Ponga), Tarañu (Cangues d'Onís) Tarna (Casu) o Taraña (Llaviana y Siero)
  • Telenón: dios de la Fuercia, el Rellumu o la Llucha. Vivía, según las creyencias ástures, nel actual monte Telenu -Lus Maragatus- y amás ésti ye ún de los símbolos del País Llionés.
  • Deidaes menores: Había una pléyade de xenios o dioses menores que, seguramente, pasaron a la relixosidá de la cultura asturllionesa nes formes de sumiciu,xanes, llumies ou'l busgosu.

Referencia

Astures, de la Wikipedia n'asturianu.


Lhicencia

GNU head Permission is granted to copy, distribute and/or modify this document under the terms of the GNU Free Documentation License, Version 1.2 or any later version published by the Free Software Foundation; with no Invariant Sections, no Front-Cover Texts, and no Back-Cover Texts. A copy of the license is included in the section entitled "GNU Free Documentation License".
Obtenío de "http://www.asturlliones.org/wiki/index.php/Astures"
Ferramientes personales